Сіноптыкі: апошнія красавіцкія дні асабліва не парадуюць цяплом
Фота з архіва
26 красавіка, Мінск . Кароткачасовыя дажджы, слабы туман і да плюс 21 градуса чакаецца ў Беларусі з 27 красавіка па 2 мая, паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
«Красавік выходзіць на фінішную прамую, і, на жаль, пасля цёплых выхадных заключныя красавіцкія дні асабліва не парадуюць цяплом. Атмасферны фронт, які ўжо ўчора пачаў аказваць свой уплыў на заходнія рэгіёны нашай краіны, паступова выцесніць за межы Беларусі цёплыя паветраныя масы і гаспадаром надвор’я стане больш халаднаватае паветра. Такі тэмпературны рэжым будзе на некалькі градусаў ніжэйшым, чым належыць па календары. Пры гэтым без дажджоў не абыдзецца», — расказалі ў Белгідрамеце.
У чацвер, 27 красавіка, ноччу на большай частцы тэрыторыі краіны, а днём па ўсходняй палавіне пройдуць дажджы. Тэмпература паветра ўначы будзе вагацца ад 0 градусаў па захадзе да плюс 10 градусаў па ўсходзе. Удзень чакаецца плюс 8-14 градусаў.
У пятніцу, 28 красавіка, ноччу будзе пераважна без ападкаў, а днём у асобных раёнах пройдуць невялікія кароткачасовыя дажджы. Тэмпература паветра ўначы складзе мінус 2 — плюс 4 градусы, а ўдзень — плюс 8-13 градусаў.
У суботу, 29 красавіка, чакаецца пераважна без ападкаў, толькі днём месцамі па паўднёвым захадзе краіны прагназуюцца кароткачасовыя дажджы. Ноччу і раніцай у асобных раёнах згусціцца слабы туман. Уначы тэмпература паветра будзе ў межах ад мінус 2 да плюс 4 градусаў, а па паўднёвым захадзе — да плюс 6 градусаў. Удзень слупок тэрмометра паднімецца да плюс 10-16 градусаў.
У нядзелю, 30 красавіка, месцамі па Беларусі пройдуць кароткачасовыя дажджы. Ноччу і раніцай у асобных раёнах слабы туман. Уначы будзе плюс 1-8 градусаў, а ўдзень — плюс 9-16 градусаў.
Паводле інфармацыі сіноптыкаў, у першых чыслах мая ў характары надвор’я па-ранейшаму будзе захоўвацца вясенняя няўстойлівасць, пры гэтым тэмпература паветра пачне павышацца.
У панядзелак — аўторак, 1-2 мая, у асобных раёнах Беларусі прагназуюцца кароткачасовыя дажджы. Ноччу і раніцай месцамі згусціцца слабы туман. Тэмпература паветра ўначы складзе плюс 1-8 градусаў, а пры праясненнях — да мінус 2 градусаў. Удзень паветра прагрэецца да плюс 11-18 градусаў, а 2 мая па поўдні чакаецца да 21 градуса цяпла.
