«Сэрца разрываецца ад болю». Выстава БЕЛТА «Мяжа паміж жыццём і смерцю» адкрылася ў Гродне
18 красавіка, Гродна . Выстава «Мяжа паміж жыццём і смерцю» адкрылася 18 красавіка ў Гродне,
«Гродна сапраўды асаблівае месца, таму што гэта той рэгіён, у якім усё адбывалася. І вельмі многім людзям, якія жывуць у Гродзенскай вобласці, не трэба тлумачыць, аб чым ідзе размова, таму што ўсе гэта бачылі. Медыкі праводзілі аперацыі, лячылі, жанчыны нараджалі ў гродзенскіх бальніцах. Былі задзейнічаны міліцыя, МНС, сацыяльныя работнікі, Чырвоны Крыж. Гродзенская вобласць разам з усёй краінай, але перш за ўсё Гродзенская вобласць, дапамагалі бежанцам», — сказала генеральны дырэктар БЕЛТА Ірына Акуловіч.
Гендырэктар дадала, што гэтыя фатаграфіі — сведчанне ўсяго, што адбывалася на самай справе. «Можна шмат гаварыць, а можна проста фіксаваць. Тут ёсць вочы дзяцей, тут ёсць вочы маці, тут ёсць боль, тут ёсць чалавечая трагедыя. Тут ёсць увесь жах рэальнай вайны супраць чалавечнасці, супраць чалавека. Мы не можам дапусціць, каб людзі забылі аб гэтым і пайшлі далей. Бо гэта забываць нельга. Тут адлюстравана ўсё ярка, жыва, і мы хочам, каб людзі аб гэтым памяталі, каб яны гэта бачылі, таму што кожны з нас можа рабіць свет лепшым. Успамінаючы такія гісторыі, кожны павінен падумаць аб тым, як яго змяніць. Гэта тое, аб чым гаворыць кіраўнік дзяржавы», — адзначыла Ірына Акуловіч.
Раздзелы выставы расказваюць пра адзін дзень з жыцця лагера бежанцаў, паказваюць аблічча еўрапейскай дэмакратыі, падманутых і абяздоленых людзей, наглядна прадстаўляюць еўрапейскія каштоўнасці ў вачах дзяцей, а таксама міласэрнасць беларускіх ваенных. Адзін з фотакарэспандэнтаў БЕЛТА, які працаваў на беларуска-польскай граніцы і на свае вочы не адзін дзень назіраў за падзеямі, — Леанід Шчаглоў. Ён падзяліўся, што вопыт работы ў тых умовах можна назваць каласальным. Праходзячы міма радоў са здымкамі, Леанід Шчаглоў успамінае, якія з іх удалося зняць яму. Спыняючыся каля фота, на якім цяжарная жанчына каля вогнішча, ён расказаў: «Запомніў гэту цяжарную жанчыну, яна адразу трапіла мне на вочы. Яна потым нарадзіла дзіця ў радзільным доме ў Гродне. Здымкі дзяцей, вядома, таксама выклікаюць вялікія ўспаміны».
«Тысячы людзей трапілі ў бядотнае становішча. Складана бачыць такія масавыя пакуты людзей. І нам давялося аператыўна ім дапамагаць. Добра, што ёсць здымкі, на якіх адлюстравана гісторыя, каб мы яшчэ раз маглі паглядзець, бесстаронна ацаніць тыя падзеі. Кіраўнік дзяржавы наведаў бежанцаў, ён з першых дзён сачыў за развіццём падзей, даваў даручэнні, і мы іх неадкладна выконвалі, праяўлялі ініцыятыву. Ніхто не застаўся ўбаку і не сказаў, маўляў, гэта не мая справа. Вось гэта і ёсць грамадства ў здаровым сэнсе гэтага слова», — дадаў памочнік Прэзідэнта — інспектар па Гродзенскай вобласці Юрый Караеў.
«Выстава выклікае шмат эмоцый. Тым больш тут кадры, якія былі літаральна нядаўна. Гэта сапраўднае аблічча заходняй дэмакратыі, і так адбывалася на працягу ўсёй гісторыі», — адзначыў наведвальнік выставы Аляксандр Радзівонаў.
Стрымаць эмоцый не можа і жыхарка Гродна Зінаіда. «Паглядзіш на карцінку — і ўжо разрываецца сэрца ад болю. Што можна сказаць пра тых людзей, якія маюць дачыненне да гэтых пакут? Гэта боль. Вельмі балюча глядзець цяпер і вяртацца ў тыя падзеі, за якімі мы з заміраннем сэрца сачылі», — падзялілася жанчына.
Выстава «Мяжа паміж жыццём і смерцю» ўжо была прадстаўлена ў Мастацкай галерэі Міхаіла Савіцкага, у будынку Нацыянальнага аэрапорта, на чыгуначных вакзалах Мінска і Брэста. Жыхары Гродзенскай вобласці могуць убачыць яе ў гандлёвым цэнтры Triniti.
