Маркевіч на акцыі «1000 дрэў памяці»: работнікі культуры ўсведамляюць сваю ролю ў развіцці краіны
30 красавіка, Мінск . Работнікі культуры ўсведамляюць сваю ролю ў развіцці дзяржавы. Аб гэтым сказаў журналістам у час акцыі «1000 дрэў памяці» міністр культуры Анатоль Маркевіч,
Анатоль Маркевіч расказаў, чаму работнікі культуры першымі вырашылі падтрымаць ініцыятыву Прэзідэнта па добраўпарадкаванні «Хатыні». «У краіне вельмі шмат зроблена для развіцця культуры па ўсіх напрамках. У абсалютнай большасці мае калегі ўдзячны за тую ўвагу, якая ў дзяржаве ўдзяляецца развіццю сферы культуры. Сёння мы добра разумеем сваю ролю ў развіцці дзяржавы. Часам мы фарміруем грамадскую думку, і чалавек, які наведвае тэатр, бібліятэку або музей, натхняецца нашай гісторыяй, пазнае пра слаўныя імёны і падзеі з нашага мінулага. На гэтым мы выхоўваем наша маладое пакаленне», — сказаў Анатоль Маркевіч.
Міністр адзначыў, што з моладдзю важна размаўляць на зразумелай ёй мове. «Літаральна ўчора мы адкрылі фестываль да Дня Перамогі, дзе нашы тэатры прадставілі цудоўныя спектаклі. У Купалаўскім тэатры практычна не было свабодных месцаў і прысутнічала вельмі шмат моладзі. Нашы маладыя людзі пранікаюцца пачуццём любові і чулых адносін да сваёй Радзімы, месца, дзе яны нарадзіліся», — падкрэсліў ён.
У час рэспубліканскага суботніка кіраўнік дзяржавы прапанаваў неабыякавым да мясцін гістарычнай памяці беларусам унесці свой уклад у добраўпарадкаванне мемарыяльнага комплексу «Хатынь». Першымі на прапанову Аляксандра Лукашэнкі адгукнуліся работнікі культуры, у тым ліку заслужаныя артысты нашай краіны.
У «Хатыні» артысты, а таксама прадстаўнікі Адміністрацыі Прэзідэнта, Савета Міністраў і грамадскіх аб’яднанняў высадзілі каля тысячы ялін. Перад пачаткам работ па добраўпарадкаванні мемарыяльнага комплексу ўдзельнікі акцыі ўшанавалі памяць ахвяр Вялікай Айчыннай вайны, усклаўшы кветкі да помніка Няскоранаму чалавеку і да Вечнага агню. Акрамя таго, удзельнікі наведалі новы музейны будынак у «Хатыні», дзе для іх былі арганізаваны экскурсіі.
