Лукашэнка аб фіналістах чэмпіянату па хакеі: нам гэтыя хлопцы падарылі мінуты, гадзіны і дні цудоўнага хакея
26 красавіка, Гродна . Хакеісты жлобінскага «Металурга» і гродзенскага «Нёмана» падарылі балельшчыкам мінуты, гадзіны і дні цудоўнага хакея. Аб гэтым Прэзідэнт Беларусі Аляксандр Лукашэнка заявіў у Гродне пасля завяршэння фінальнага вырашальнага матчу ў беларускай хакейнай экстралізе сезона-2022/23,
«Нам гэтыя хлопцы падарылі мінуты, гадзіны і дні цудоўнага хакея. Шмат будзе напісана, сказана аб гэтай серыі, аб сённяшнім матчы. Ён быў нечаканым для мяне, неверагодным», — сказаў Аляксандр Лукашэнка.
Кіраўнік дзяржавы адзначыў, што на лёдзе змагаліся дзве каманды: маладая, заўзятая, звернутая ў будучыню дружына «Металурга» і сур’ёзная, дарослая, месцамі вельмі дарослая каманда «Нёмана».
«Вы, хлопцы, дарэмна некаторыя нос звесілі. Гэта добрая каманда і калі вы яе захаваеце, за гэтымі хлопцамі вялікая будучыня, яны шмат прынясуць шчасця. Вам скажу вялікі дзякуй. Вы сапраўды вытрымалі малюнак гульні з першай да апошняй мінуты, выканалі, я так разумею, заданне сваіх трэнераў, гулялі дакладна, па месцы. Але не хапіла адной секунды, а можа, долі секунды, каб гэты цудоўны спектакль быў прадоўжаны. Але спорт ёсць спорт, адсюль нікуды не дзецца», — падтрымаў гродзенцаў Прэзідэнт.
«На гэтай арэне сёння былі дзве роўныя, прыгожыя каманды. Вы не дарэмна ясце хлеб. Вы яго сёння адпрацавалі з першай да апошняй секунды, і, думаю, ніхто не кіне камень у ваш агарод», — падкрэсліў беларускі лідар.
Аляксандр Лукашэнка выказаў асобную ўдзячнасць кіраўнікам рэгіёнаў. Паводле яго слоў, губернатары заўсёды дапамагаюць хакеістам і ўносяць свой уклад у развіццё гэтага віду спорту. «Я вельмі рады вяртанню гродзенцаў у вялікі хакей. І я таксама рады, што «Металург» пацвердзіў сваю загартоўку. Вялікі дзякуй вам!» — дадаў кіраўнік дзяржавы.
У час цырымоніі ўзнагароджвання на лёдзе, акрамя фіналістаў, таксама прысутнічала каманда Прэзідэнта Беларусі. Аляксандр Лукашэнка растлумачыў, што нядаўна завяршыўся аматарскі турнір па хакеі і яго дружына вырашыла прыехаць у Гродна падтрымаць фіналістаў экстралігі. «Гэта хлопцы, якія гэтак жа, як вы, змагаліся, на зубах выцягвалі многія гульні, цярпелі, мучыліся. Гэта сапраўдныя хакеісты. Іх вялікі хакей, кажуць, закончыўся, яны прыйшлі ў яшчэ большы хакей — аматарскі. І яны перамаглі ў чэмпіянаце Беларусі гэтага года і вырашылі прыехаць, паглядзеўшы хакей, павіншаваць вас з гэтым вялікім спектаклем, — растлумачыў кіраўнік дзяржавы. — Гродзенцы, вялікі дзякуй вам!»
Аляксандр Лукашэнка асабіста павіншаваў хакеістаў «Металурга» з перамогай і ўручыў камандзе заваяваны кубак.
Як паведамлялася, 24 красавіка ў Гродне адбыўся заключны матч беларускай хакейнай экстралігі сезона-2022/23. За Кубак Прэзідэнта ў сёмым паядынку фінальнай серыі змагаліся «Нёман» і жлобінскі «Металург».
Раней каманды з Гродна і Жлобіна сустракаліся ў фіналах у 2012 і 2013 гадах. Першая дуэль завяршылася на карысць «ваўкоў», праз год «чырвона-чорныя» ўзялі рэванш. Трэцяя сустрэча ў цяперашнім сезоне завяршылася перамогай «Металурга». Такім чынам хакеісты са Жлобіна сталі ўладальнікам галоўнага трафея экстралігі трэці раз.
