Грамада: Беларусь і Узбекістан выказваюць шчырую ўзаемную цікавасць і імкнуцца ўмацоўваць супрацоўніцтва
Фота з архіва
13 красавіка, Мінск . Беларусь і Узбекістан выказваюць шчырую ўзаемную цікавасць і імкнуцца ўмацоўваць супрацоўніцтва, заявіў першы намеснік міністра культуры Валерый Грамада на ўрачыстым гала-канцэрце на сцэне Белдзяржфілармоніі, якім адкрыліся Дні культуры Узбекістана ў Беларусі,
«Гэта знамянальная падзея ў культурным жыцці нашых краін, якая сведчыць у першую чаргу аб шчырым узаемным інтарэсе адзін да аднаго і імкненні развіваць і далей умацоўваць наша супрацоўніцтва. Менавіта гістарычная памяць народа, яго культура і традыцыі — у гэтым сканцэнтраваны самабытныя духоўныя і агульначалавечыя каштоўнасці любога пакалення», — сказаў Валерый Грамада.
Дзве краіны многае аб’ядноўвае, прадоўжыў першы намеснік міністра. «У нас шмат агульнага. І сёння мы беражліва захоўваем і шануем памяць, у тым ліку аб людзях, якія цаной уласнага жыцця здабывалі перамогу ў Вялікай Айчыннай вайне. Сярод іх — 32 ураджэнцы Узбекістана, якія ўдзельнічалі ў баях за вызваленне Беларусі і былі ўдастоены звання Героя Савецкага Саюза», — сказаў ён.
Акрамя таго, у Ташкенце быў адкрыты помнік класіку беларускай літаратуры Якубу Коласу, у яго гонар названа вуліца. А ў адным са сквераў Мінска стаіць бюст вялікага ўзбекскага паэта, мысліцеля і дзяржаўнага дзеяча Алішэра Наваі.
«Сёння наша супрацоўніцтва з Узбекістанам развіваецца па розных напрамках. Узбекскія выканаўцы, артысты, навуковыя дзеячы — удзельнікі і госці міжнародных фестываляў і конкурсаў, навуковых канферэнцый (якія праводзяцца ў Беларусі. — Заўвага БЕЛТА)», — адзначыў Валерый Грамада. У якасці прыкладаў ён згадаў Міжнародны фестываль мастацтваў «Славянскі базар у Віцебску», Мінскі міжнародны кінафестываль «Лістапад». Сам жа Узбекістан — гэта шматнацыянальная, прыгожая і вельмі талерантная краіна, у якой жывуць цудоўныя і таленавітыя людзі, добрыя і надзейныя сябры, адзначыў Валерый Грамада.
У студзені гэтага года Беларусь і Узбекістан адзначылі 30 гадоў з дня ўстанаўлення дыпламатычных адносін. Правядзенне Дзён культуры Узбекістана ў нашай краіне — адна са знакавых падзей у гэту юбілейную дату. А для беларусаў — выдатная магчымасць адкрыць новыя грані гісторыка-культурнай спадчыны дружалюбнай краіны і адчуць яе незвычайны, яркі, неардынарны ўсходні характар.
На сцэне Белдзяржфілармоніі сваю творчасць прадстаўляюць майстры мастацтваў Узбекістана. У праграму гала-канцэрта ўвайшлі музычныя і харэаграфічныя нумары ад народных артыстаў, лаўрэатаў дзяржаўнай прэміі і пераможцаў міжнародных конкурсаў.
Мерапрыемствы Дзён культуры Узбекістана прадоўжацца 14 красавіка ў Слуцку, культурнай сталіцы Беларусі 2023 года.
