Чарвякоў: рост аб’ёмаў вытворчасці і продажаў садзейнічае павелічэнню даходаў насельніцтва
Міністр эканомікі Аляксандр Чарвякоў. Фота з архіва
30 красавіка, Мінск . Рост аб’ёмаў вытворчасці і продажаў станоўча ўплывае на ўзровень даходаў насельніцтва. Аб гэтым заявіў міністр эканомікі Аляксандр Чарвякоў, адказваючы на пытанне карэспандэнта аб дамінуючых трэндах у рабоце эканомікі па выніках першага квартала 2023 года.
Паводле слоў Аляксандра Чарвякова, у эканоміцы прадаўжаецца аднаўленчая дынаміка. За студзень-сакавік ВУП павялічыўся да 97,9 працэнта, у сярэднім плюс 1,5 працэнтнага пункта ў месяц. А толькі ў сакавіку ВУП ужо склаў 100,8 працэнта.
«Важнейшай перадумовай такіх вынікаў сталі поспехі ў прамысловасці, тэмп росту ў сакавіку склаў звыш 109 працэнтаў. Прырасталі ў першую чаргу за кошт прадукцыі машынабудавання, электраабсталявання, мікраэлектронікі, харчовай і лёгкай прамысловасці. Устойліва працуе і сельская гаспадарка з прыростам 3 працэнты. Павялічваюцца аб’ёмы вытворчасці мяса і малака, расце пагалоўе і прадукцыйнасць. Калі паглядзець на іншыя галіны, напрыклад транспарт, то захоўваецца даволі высокі ўзровень росту пасажыраабароту — амаль 116 працэнтаў. Гэта азначае, што людзі актыўна выязджаюць на адпачынак, а бізнес — у дзелавыя паездкі. Па грузаперавозках (без уліку трубаправоднага транспарту) таксама прырастаем — штомесяц каля 5 працэнтных пунктаў. Гэта добрая дынаміка», — адзначыў кіраўнік міністэрства.
Аляксандр Чарвякоў таксама звярнуў увагу на паляпшэнне асноўных фінансавых паказчыкаў арганізацый у студзені-лютым і аднаўленне аб’ёмаў экспарту.
«Добрыя фінансавыя рэзультаты атрыманы прадпрыемствамі. Рэнтабельнасць продажаў складае каля 8 працэнтаў. Атрымана чыстага прыбытку на 26 працэнтаў больш, чым за аналагічны перыяд мінулага года. Скарацілася на 9,5 працэнта колькасць стратных прадпрыемстваў. А даўгавая нагрузка знізілася да 49,5 працэнта. Гэта мінус 1,2 працэнтнага пункта да пачатку года. У бягучым годзе толькі за два месяцы мы ўжо на 98 працэнтаў кампенсавалі страты на рынках краін Захаду і Украіны за кошт павелічэння паставак у дружалюбныя дзяржавы. У лютым да ўзроўню студзеня бягучага года экспарт тавараў і паслуг вырас больш як на 4 працэнты (плюс $200 млн). Больш таго, вартасныя аб’ёмы экспарту ў лютым на 3 працэнты (на $100 млн) перавысілі аб’ёмы экспарту лютага 2022 года. Паводле нашых ацэнак, па выніках першага квартала тэмпы росту экспарту тавараў і паслуг складуць больш за 105 працэнтаў. Гэта дае магчымасць забяспечваць стабільнасць на валютным і фінансавым рынку», — падкрэсліў кіраўнік эканамічнага ведамства.
Паводле слоў міністра, даручэнне кіраўніка дзяржавы па стрымліванні росту цэн выконваецца. «Гадавая інфляцыя ў сакавіку склала 6 працэнтаў, зніжэнне ў параўнанні з узроўнем лютага амаль у 2 разы. Беларусь і Расія ў лідарах па самых нізкіх тэмпах інфляцыі сярод краін-суседзяў (6 працэнтаў і 3,5 працэнта адпаведна). Неабходна адзначыць, што ў цэлым у свеце назіраецца тэндэнцыя запаволення інфляцыі. Аднак у краін-суседзяў, якія так актыўна дэманструюць свае недружалюбныя адносіны да нас і Расіі, інфляцыя перасягае 16 працэнтаў. Бумеранг заўсёды вяртаецца. І санкцыйны таксама», — адзначыў кіраўнік міністэрства.
Рост аб’ёмаў вытворчасці і продажаў садзейнічае павелічэнню даходаў насельніцтва. «Згодна з апошнімі данымі за квартал, узровень рэальнай заработнай платы, гэта значыць з улікам інфляцыі, вырас на 1,7 працэнта. А пенсіі за гэты перыяд у рэальным выражэнні выраслі на 9,6 працэнта. Гэта ключавыя элементы ў структуры даходаў. Таму мы ацэньваем, што тэмпы росту рэальных даходаў насельніцтва таксама перавысяць 100 працэнтаў», — рэзюмаваў міністр эканомікі.
